《Interviu》專訪草蜢 與觀眾分享全新國語專輯製作過程及互爆拍檔秘密

草蜢近期推出全新國語大碟《Music Walker》,更去到台灣辦發布會,雖然行程緊密,不過他們愈忙愈高興,仲好滿意台灣傳媒給他們一個「凍齡天團」的稱號。對於90後出生的女主持阿Dan來說,草蜢三子可以說是「叔叔輩」,都是靠《我的少女時代》等電影才認識他們的歌!雖然隔住一條寬闊的Generation Gap,但阿智與傑仔亦好比心機講述當年紅遍台灣的威水史,更話自己是土炮男團,就好似港式菠蘿包及奶茶,對比之下,Kpop偶像就是泡菜。不過即使時下青年熱捧韓風,蘇老闆女兒心目中的偶像永遠都是爸爸,還時不時去看爸爸登台,Sweet到蘇老闆講起都怕怕醜醜。

提到新碟收錄歌曲中,除了搵黎王菀之、周杰倫獻曲,其餘9首都是由草蜢自己作曲甚至填詞,其中一首傑仔操刀關於母親的歌曲,阿智都表示聽了有所感受,更憶述當年媽媽用麵粉散在地上教他們跳舞的情景。

草蜢對住阿Dan愈傾愈放,被問到有什麼生活怪癖時亦毫不隱瞞,阿智大爆蘇老闆多年來都要攬攬枕才訓得著的癖好,仲話結左婚應該是攬老婆訓啦!不過蘇老闆就一副慘慘豬樣表示「老婆唔俾我攬,要攬返攬枕」,而他亦突然跳Tone問返阿Dan「你知唔知乜野係黑洞?」,令眾人擘大個口得個窿唔識答,原來他是想講阿智間房似黑洞!

是次訪問當然不少得回應FB問題的環節,對於被網民稱為「蔡一威」,蘇老闆唔止冇介意,仲歡迎大家叫他蔡生。而阿智更應網民要求在鏡頭前瘋狂揈頭髮,十足十洗髮水廣告。問到傑仔最拿手煮什麼,他便滔滔滔不絕教大家整咖哩雞,不過亦奉勸阿Dan「咖哩雞」唔好亂試啊!